ພຣູເດັນໂຊລ໌ ລາວ ເເລະ ກົມປະກັນໄພບໍລິຈາກອຸປະກອນການຮຽນໃຫ້ເເກ່ນ້ອງໆນັກຮຽນທີ່ຂາດເຂີນ ທີ່ເເຂວງຊຽງຂວາງ

ວຽງຈັນ, 7 ມິຖຸນາ 2024

ບໍລິສັດ ພຣູເດັນໂຊລ໌ ປະກັນໄພຊີວິດ ລາວ ຈຳກັດ (“ພຣູເດັນໂຊລ໌ ລາວ”), ໜຶ່ງໃນບໍລິສັດປະກັນໄພຊັ້ນນຳໃນປະເທດລາວ ພ້ອມດ້ວຍ ກົມປະຕິຮູບລັດວິສາຫະກິດ ເເລະ ການປະກັນໄພ (“ກົມ ປລປ”), ກະຊວງການເງິນໄດ້ບໍລິຈາກ ເຄື່ອງ ເເລະ ອຸປະກອນການຮຽນໃຫ້ກັບໂຮງຮຽນທີ່ຢູ່ເເຂວງຊຽງຂວາງ ເພື່ອຄຳນັບຮັບຕ້ອນການກະກຽມເປີດກອງປະຊຸມໃຫຍ່ 3 ຂັ້ນຂອງຄະນະພັກຮາກຖານ ກົມປະຕິຮູບລັດວິສາຫະກິດ ເເລະ ການປະກັນໄພ ເເລະ ວັນເດັກສາກົນ.

ສຳລັບເຄື່ອງບໍລິຈາກຄັ້ງນີ້ເເມ່ນລວມມີ: ອຸປະກອນການຮຽນ, ອຸປະກອນກິລາ, ເຄື່ອງກິລາ,​ ເເລະ ຄອມພິວເຕີ້ ພ້ອມເຄື່ອງພິມເອກະສານ 2 ຊຸດ. ອຸປະກອນເຫຼົ່ານີ້ຈະຖືກສົ່ງໄປທີ່ ໂຮງຮຽນມັດຖະຍົມຕອນປາຍ ເຊິ່ງຢູ່ເຂດຫ່າງໄກສອກຫຼີກ ບ້ານຄັງວຽງ, ເມືອງ   ໝອກ,​ ເເຂວງ ຊຽງຂວາງ. ຈຸດປະສົງຂອງການບໍລິຈາກຄັ້ງນີ້ເເມ່ນເພື່ອສະໜັບສະໜູນການຮຽນຂອງນັກຮຽນ ເເລະ ກິດຈະກຳການກິລາຂອງເດັກນ້ອຍໃນໂຮງຮຽນ.

ທ່ານ ມານິສ ເກີບູຊານີ, ຜູ້ອຳນວຍການໃຫຍ່ ພຣູເດັນໂຊລ໌ ລາວ ໄດ້ກ່າວວ່າ: “ຈຸດປະສົງຂອງບໍລິສັດ ພວກເຮົາເເມ່ນ “ດູເເລຊີວິດ ເພື່ອອະນາຄົດຂອງທຸກໆຄົນ”, ເປົ້າໝາຍຂອງພວກເຮົາເເມ່ນການສ້າງຊຸມຊົນທີ່ມີຄວາມຢືດຢຸ່ນຜ່ານໂຄງການເເນວຄິດລິເລີ່ມທີ່ສຸມໃສ່ການສຶກສາ, ສຸຂະພາບ, ເເລະ ຄວາມປອດໄພ ເເບບໄລຍະຍາວ. ການບໍລິຈາກຄັ້ງນີ້ ເເມ່ນການຕອບເເທນຄືນສັງຄົມ, ພວກເຮົາຫວັງວ່າເດັກນ້ອຍເຫຼົ່ານີ້ຈະໄດ້ຮັບການສຶກສາທີ່ຈຳເປັນ ເເລະ ມີສຸຂະພາບທີ່ດີຂຶ້ນຜ່ານກິດຈະກຳໃນໂຮງຮຽນ.”

ໃນພິທີມອບຮັບມີ ທ່ານ ໄພທູນ ທ່ຽງລະໄມ,​ ວ່າການຫົວໜ້າກົມ ປະຕິຮູບລັດວິສາຫະກິດ ເເລະ ການປະກັນໄພ ພ້ອມດ້ວຍຄະນະ, ກະຊວງການເງິນ ເເລະ ທ່ານ ມານິສ ເກີບູຊານີ, ຜູ້ອຳນວຍການໃຫຍ່ ແລະ ທີມງານບໍລິຫານ ພຣູເດັນໂຊລ໌ ລາວ

ກ່ຽວກັບ ບໍລິສັດ ພຣູເດັນໂຊລ໌ ລາວ

ພຣູເດັນໂຊລ໌ ຄໍອອບໂປເຣເຊິນ ເອເຊຍ ເປັນເຈົ້າຂອງ ພຣູເດັນໂຊລ໌ ລາວ ແຕ່ພຽງຜູ້ດຽວ. ພວກເຮົາມີຫ້ອງການຕົວເເທນທີ່ນະຄອນຫຼວງວຽງຈັນໃນເດືອນ ມີນາ 2015 ເເລະ ໄດ້ຮັບໃບອະນຸຍາດການດຳເນີນທຸລະກິດຈາກກະຊວງການເງິນໃນເດືອນ ເມສາ 2016 ພຣູເດັນໂຊລ໌ ລາວ ເລີ່ມຕົ້ນທຸລະກິດໃນເດືອນ ພຶດສະພາ 2016 ແລະ ນຳເອົາຜະລິດຕະພັນປະກັນໄພຊີວິດທີ່ແທດເໝາະກັບ ຄວາມຕ້ອງການໃນການປົກປ້ອງຄຸ້ມຄອງ ແລະ ໄດ້​ຮັບ​ເງິນ​ຄືນ​ເມື່ອ​ຄົບ​ສັນ​ຍາຂອງຄົນລາວ. ໃນປະຈຸບັນ, ບໍລິສັດ ພຣູເດັນໂຊລ໌ ລາວ ໄດ້ຈຳໜ່າຍຜະລິດຕະພັນຜ່ານ ລະບົບທະນາຄານ ທີ່ມີສາຂາທົ່ວປະເທດ ເເລະ ຜ່ານລະບົບຂາຍຕົງອີກດ້ວຍ.